PROFESSOR TIL ÅTAK PÅ ERKEATEIST.

Den tidlegare ateisten Anthony Flew klandrar Richard Dawkins for å vera ein trangsynt sekularist.

ØYSTEIN LID

Publisert 07.08.2008 i DagenMagazinet.


Det er i ein nyleg publisert artikkel på nettstaden bethinking.org at den tidlegare ateisten og Oxford-professoren Anthony Flew tilkjennegir sine synspunkt. Richard Dawkins er evolusjonsbiologen som i ei rekkje bøker, foredrag og debattar argumenterer for evolusjonisme og mot eksistensen av Gud. Han siste bok, «Gud, en vrangforestilling» er solgt i ein million eksemplar, og det er i fyrste rekkje denne boka Flew protesterer mot.

«Gløymde» Einstens Gudstru
Det største problemet Flew har med Dawkins bok er at ho ikkje søker sanninga, slik ei akademisk bok bør gjera, men heller prøver å overtyda andre om forfattarens private synspunkt. Som døme på dette viser Flew til at Dawkins siterer Albert Einstein fem gonger i boka si, men gløymer å nemna at Einstein trudde ein gud sto bak universet.

– Dawkins nemner ikkje at kompleksiteten i den fysiske verda leidde Einstein til å tru at det måtte stå ein guddommeleg intelligens bak. Dette er ein viktig indikasjon på hans mangel på akademisk oppriktigheit, og dette gjer at eg anklagar han for å ha blitt ein trangsynt sekularist, skriv Flew.

Kan ein gamal mann tenkja?
Det vakte stor oppsikt då erkeateisten Anthony Flew i 2004 annonserte at han i ein alder av 81 var blitt overtydd om eksistensen av ein skapargud. Ateistar prøvde den gongen å avskriva Flew på bakgrunn av hans høge alder, særleg då det vart kjent at han hadde fått hjelp til å skriva boka som vart utgitt under hans namn; «Det finst ein Gud: Korleis verdas mest notoriske ateist ombestemte seg». I eit svar på kritikken frå Flew i den britiske avisa The Daily Telegraph nyttar Dawkins igjen denne taktikken:

– Flew har mista evna til å skriva bøker, men han kan tilsynelatande heller ikkje lesa bøker lenger, svarte Dawkins avisa, og meinte at Flew berre hadde kikka i innhaldslista for å finna referansane til Einstein. Dawkins valde dermed med vilje å utelata at Flew også siterer "Gud, en vrangforestilling" også utanom Einstein-referansane.

Eg er kanskje gamal...
I eit brev datert 4. juni tilbakeviste Anthony Flew også påstandane om at han skulle ha blitt brukt av medforfattaren av "Det finst ein Gud", Roy Varghese, og eigentleg ikkje visste kva som stod i boka.

– Eg ville aldri ha utgitt ei bok med mitt namn på som eg ikkje står hundre prosent inne for. Eg trengte nokon som kunne gjera sjølve skrivearbeidet sidan eg er 84 år gamal. Tanken om at nokon manipulerte meg fordi eg er gamal er heilt feil. Eg er kanskje gamal, men vanskeleg å manipulera, skreiv Flew.
DM